חיים שיש בהם אהבת תורה ויראת שמים!

די בארימטע אפטיילונג 'מסגרת מיוחדת' אין ישיבה תורה ויראה דרבינו דסאטמאר קרית יואל שמ'ט מיט איר געוואלדיגע פירות און אויסערגעווענליכע הצלחה, ווען די חשוב'ע עלטערן זענען מלא התפעלות, שבח ותהילה, אויף די כוחות עצומות וואס ווערן אריינגעלייגט אין די קינדער, און שעפן תענוג ונחת פון זייערע יונגע תלמידי חכמים וועלכע זענען קונה גרויסע חלקים פון די תורה הק' אויף אזא הערליכן פארנעם. 

דער חדר לייגט אריין ספעציעלע כוחות אז די צייט זאל אויסגענוצט ווערן צום מאקסימום, ווען דער גאנצער סדר היום לויפט מיט א פונקטליכן סדר און סיסטעם. די מלמדים און מרביצי תורה אינוועסטירן טעג און נאכט, און זייער גאנצע הארץ און נשמה ארויפצוברענגען די תלמידים אויף די העכסטע דרגות, און די הנהלה לייגט אריין דמי"ם תרתי משמע פאר זייער הצלחה און התעלות.

עס קוועלט דאס הארץ מיטצוהאלטן וויאזוי די קינדערלעך לויפן יעדן טאג אין חדר מיט אזא חשק און צמאון. דאס לערנען איז מיט א פייערדיגן חיות דקדושה און געשמאק. די קינדער קומען אן צו ענדיגן גאנץ חמשה חומשי תורה שוין אין כיתה ה', און פון דארט שטייגט מען ווייטער צו גאנצעטע מסכתות משניות, בלעטער גמרא, ספרי הנ"ך, מוסר ויראת שמים, און פיל מער. 

כאטש די הוצאות זענען פיל מער און עס זענען נישט דא קיין שום זייטיגע הכנסות, שטרענגען זיך די עלטערן אן צו צאלן א העכערן שכר לימוד, ווייל זיי ווילן געבן פאר זייער קינד די געלעגנהייט מיטצוהאלטן אזא שטארקן סדר היום וסדר הלימודים. די הנהלה שטרענגט זיך אן איבער די כוחות צוצושטעלן אלעס וואס פעלט זיך אויס פאר זייער הצלחה.

אצינד קומען די עלטערן ארויס מיט א רוף צו זייערע נאנטע און באקאנטע, און צו אלע אוהבי ותומכי תורה, צו העלפן דעם מוסד גיין מחיל אל חיל און ווייטער קענען געבן פאר די טייערע תלמידים די מתנה און ברכה פון אזא ברייטע ידיעה און הבנה אין די תורה הק', און מגדל זיין בנים ובני בנים עוסקים בתורה ובמצוות, המאירים את העולם בתורה ובמעשים טובים.